Accessibility setting

Skip to main menu

Skip to secondary menu

Skip to table of contents

Skip to content

Molimau a Ieova

La‘u Tusi o Tala o le Tusi Paia

E MAUA I LE

Tala 92: Faatū e Iesu Ē ua Oti

O LE teine o loo e vaai atu iai e 12 ona tausaga. O loo uuina e Iesu lona lima, a o lona tamā ma lona tinā o loo tutū latalata iai. Pe e te iloa le māfuaaga ua latou foliga fiafia ai?

Ua toe faatūina e Iesu le afafine o Iairo

O le tamā o le teine o se tamāloa tāua e igoa iā Iairo. O le isi aso na ma‘i ai lona afafine, ma taoto o ia i le moega. Ae e le‘i faasolo ina malosi o ia. Ae na atili ai ona ma‘i. Na popole tele Iairo ma lana avā auā e foliga mai o le a i‘u ina oti la la tama teine. Na o le to‘atasi lava le la tama. Ona alu ai lea o Iairo ma sa‘ili iā Iesu. Na ia faalogo o loo faia e Iesu ni vavega.

Ina ua maua e Iairo Iesu, sa to‘atele tagata na si‘omiaina o ia. Ae na sao Iairo i totonu ma faapau i vae o Iesu. ‘Ua ma‘i tigāina si ou afafine,’ o lana tala lea. ‘Faamolemole se‘i e maliu mai e faamalosi iā te ia.’ Na fai atu Iesu o le a alu atu o ia.

A o latou savavali, sa tautulei pea le motu o tagata i le fia latalata atu. Na tū faafuase‘i Iesu. ‘O ai na pa‘i mai iā te au?’ o lana fesili lea. Na iloa e Iesu ina ua alu ese se malosi mai iā te ia. Ae o ai? O se fafine na ma‘i tigāina mo le 12 tausaga. Na pa‘i atu i ofu o Iesu, ma faamālōlō ai!

Na fiafia Iairo i lenei mea, auā ua ia iloa ai e faigofie i a Iesu ona faamālōlō i se tasi. Ona sau lea o se avefe‘au: ‘Aua e te toe faalavelave iā Iesu,’ o lana upu lea i a Iairo. ‘Ua oti lou afafine.’ Na iloa mamao atu e Iesu lenei mea ma na ia fai atu iā Iairo: ‘Aua e te popole, o le a lē afāina o ia.’

Ina ua latou oo atu i le fale o Iairo, sa fetagisi tagata ma le faanoanoa. Ae ua fai atu Iesu: ‘Aua tou te fetagisi. E le‘i oti le teineitiiti. O loo moe o ia.’ Ae na latou toē ma ula iā Iesu, auā ua latou iloa ua oti o ia.

Ona ave lea e Iesu matua o le teine ma le to‘atolu o ona aposetolo i le potu o loo taatia ai le teineitiiti. Na ia tago atu i lona lima ma fai atu: ‘Nofo i luga!’ Ona toe ola lea o ia e pei ona e vaai atu iai. Na tū o ia i luga ma savalivali solo! O le māfuaaga lenā ua fiafia ai lona tinā ma lona tamā.

E lē o le tagata muamua lenei na faatūina e Iesu mai le oti. O le tagata muamua o loo ta‘ua e le Tusi Paia o le tama a se fafine ua oti lana tane e nofo i Naina. Ona toe faatūina fo‘i lea e Iesu Lasalo, le tuagane o Maria ma Mareta, mai le oti. A pule loa Iesu o le tupu a le Atua, o le a ia toe faatutūina le to‘atele o tagata oti i le ola. Pe tatou te le fiafia i lenei mea?

Luka 8:40-56; 7:11-17; Ioane 11:17-44.



Fesili

  • O ai le tamā o le teine itiiti o loo i le ata, ma aiseā na popole tele ai i la‘ua ma lana avā?
  • O le ā na faia e Iairo ina ua ia mauaina Iesu?
  • O le ā na tupu a o aga‘i atu Iesu i le fale o Iairo, ma o le ā le fe‘au na maua e Iairo?
  • Aiseā na ula ai tagata i le fale o Iairo iā Iesu?
  • Ina ua uma ona ia aveina aposetolo e to‘atolu ma matua o le teineitiiti i lona potu, o le ā na faia e Iesu?
  • O ai isi tagata na faatūina e Iesu mai le oti, ma o le ā ua faaalia e lenei mea?

Fesili faaopoopo

  • Faitau le Luka 8:40-56.

    Na faapefea ona faaalia e Iesu lona alofa mutimutivale ma le magafagafa i ana feutaga‘iga ma le fafine na maua i le puna toto, ma o le ā e mafai ona a‘oa‘oina mai ai e toeaina Kerisiano? (Luka 8:43, 44, 47, 48; Levi. 15:25-27; Mata. 9:12, 13; Kolo. 3:12-14)

  • Faitau le Luka 7:11-17.

    Aiseā e mafai ai ona matuā faamāfanafanaina i latou ua maliliu ē e pele i a i latou, i le tali atu a Iesu i le fafine ua oti lana tane i Naina? (Luka 7:13; 2 Kori. 1:3, 4; Epe. 4:15)

  • Faitau le Ioane 11:17-44.

    E faapefea ona faaalia e Iesu o se faalogona masani le faavauvau i le maliu o sē e pele? (Ioa. 11:33-36, 38; 2 Samu. 18:33; 19:1-4)