Accessibility setting

Skip to main menu

Skip to secondary menu

Skip to table of contents

Skip to content

Molimau a Ieova

La‘u Tusi o Tala o le Tusi Paia

Tala 50: Fafine Lototetele e To‘alua

INA ua tutupu faalavelave iā Isaraelu, sa latou alalaga loa iā Ieova. Na tali mai iai Ieova i lona tuuina mai iai o ni faamasino e fesoasoani iā i latou. O Iosua o le faamasino muamua, ma o igoa nei o isi faamasino, o Otinielu, Euta ma Samekara. Ae o isi tagata e to‘alua na fesoasoani iā Isaraelu o ni fafine e igoa iā Tepora ma Iaeli.

Talanoa Tepora iā Parako

O Tepora o se perofeta fafine. Na tuuina atu iai e Ieova ni faamatalaga e uiga i le lumana‘i, ma sa ia ta‘uina atu i tagata mea uma na fai mai ai Ieova. O Tepora fo‘i o se faamasino. E nofo o ia i lalo o le pama i le atunuu maugā, na te tuuina atu ni fesoasoani mo faafitauli o tagata.

O le taimi lea sa tupu ai Iapino i Kanana. Sa iā te ia ni kariota tau e 900. Sa malosi tele lana ‘autau ua to‘atele ai tagata Isaraelu na faamalosia ia avea ma auauna a Iapino. O le ta‘ita‘i o le ‘autau a Iapino e igoa iā Sesera.

I se tasi aso na aami ai e Tepora ia Parako le faamasino, ma faapea atu: ‘Ua tulei mai Ieova: “Ia e aveina ni tagata se to‘a 10,000 ma outou ō atu i le Mauga o Tapora. O le a ou tuuina atu ai Sesera ma ana ‘autau iā te oe.”

Ua fai atu Parako iā Tepora: ‘O le a ou alu pe afai e te sau ta te ō.’ Na alu Tepora, ae sa ia faapea atu iā Parako: ‘E lē mauaina e oe le viiga mo le manumalo, auā o le a tuuina atu e Ieova Sesera i lima o se fafine.’ Ma o le mea lenā sa tupu.

Ona alu ifo lea o Parako i le Mauga o Tapora ia fetaia‘i ma fitafita a Sesera. Na faafuase‘i lava ona faatupu e Ieova se lolo, ma o le to‘atele o fitafita a le fili sa malelemo. Ae sa sola ese Sesera.

Parako, Iaeli ma Sesera

E le‘i umi ae taunuu Sesera i le fale‘ie o Iaeli. Sa ia taliaina o ia ma avatu iai ni suāsusu. Sa faaosoina ai lona fia moe, ma e le‘i umi lava ae moegase. Ona tutui ai lea e Iaeli le pine o le fale‘ie i le ulu o lenei tamāloa leaga. Mulimuli ane, ina ua sau Parako, sa ia faaali atu loa i ai Sesera ua oti! O lea sa taunuu moni lava upu a Tepora.

Ona oti mulimuli ai lea o le Tupu o Iapino, ma ua toe filemu nei Isaraelu mo sina taimi.

Faamasino 2:14-22; 4:1-24; 5:1-31.



Fesili

  • O ai na avea ma faamasino, o ai igoa o nisi o i latou?
  • O le ā le faaeaga faapitoa na maua e Tepora, ma o le ā e aofia ai?
  • Ina ua faamata‘uina Isaraelu e le tupu o Iapino ma le ta‘ita‘i o lana ‘autau o Sesera, o le ā le fe‘au a Ieova na ta‘u atu e Tepora i le faamasino o Parako, ma o ai na ta‘ua e Tepora o le a mauaina le viiga mo le manumalo?
  • Na faapefea ona faaalia e Iaeli o ia o se fafine lototele?
  • O le ā na tupu ina ua mavae le oti o le tupu o Iapino?

Fesili faaopoopo

  • Faitau le Faamasino 2:14-22.

    Na faapefea ona faapogaia e tagata Isaraelu le to‘asā o Ieova iā i latou, ma o le ā le lesona tatou te a‘oa‘oina mai ai? (Faama. 2:20; Faata. 3:1, 2; Eseki. 18:21-23)

  • Faitau le Faamasino 4:1-24.

    O ā ni lesona o le faatuatua ma le lototele e mafai ona a‘oa‘oina e fafine Kerisiano i aso nei mai faaa‘oa‘oga a Tepora ma Iaeli? (Faama. 4:4, 8, 9, 14, 21, 22; Faata. 31:30; 1 Kori. 16:13)

  • Faitau le Faamasino 5:1-31.

    E faapefea i le pese manumalo a Parako ma Tepora ona fai ma tatalo e faatatau i le taua o loo faalolo‘i mai o Amaketo? (Faama. 5:3, 31; 1 No. 16:8-10; Faaa. 7:9, 10; 16:16; 19:19-21)