Accessibility setting

Skip to main menu

Skip to secondary menu

Skip to table of contents

Skip to content

Molimau a Ieova

Faa-Samoa

La‘u Tusi o Tala o le Tusi Paia

Tala 16: Ua Maua le Avā Lelei a Isaako

PE E te iloaina le fafine lenā o i le ata? O Repeka. Ae o le tamāloa o loo ia alu atu e feiloa‘i i ai o Isaako. O le a avea o ia ma ana avā. Na faapefea ona tupu lenei mea?

Sa mana‘o Aperaamo ia maua se avā lelei ma lona atalii. Sa lē mana‘o o ia e faaipoipo atu Isaako i se fafine o Kanana, auā o na tagata e tapua‘i i atua sesē. Ona valaau lea e Aperaamo o lana auauna ma fai atu: ‘Ou te mana‘o e te alu i lo‘u aiga i Karana e aumai ai se avā mo lo‘u atalii o Isaako.’

Sa ave loa e le auauna a Aperaamo kamela e sefulu ma ō mo se malaga umi. Ina ua oo atu e latalata i le mea e nonofo ai aiga o Aperaamo, sa latou faatali ai i ina i le vaieli. Ua latalata i le afiafi, o le taimi e o mai ai fafine o le aai e asu vai i le vaieli. Ona fai ai lea e le auauna a Aperaamo se tatalo iā Ieova: ‘Ia avea le fafine na te aumaia ni vai mo a‘u ma a‘u kamela ma lē e te filifilia e avea ma avā a Isaako.’

Ua feiloa‘i Repeka ma Isaako

E le‘i umi lava ae sau loa Repeka e asu vai. Ina ua fai atu i ai le auauna mo sina vai, sa ia aumaia i ai. Ona alu atu loa lea o ia ma aumai ni vai mo kamela ua fia feinu. Sa faigatā tele auā o kamela e feinu tetele.

Ina ua uma, sa fesili atu loa i ai le auauna po o ai lona tamā. Sa ia fai atu fo‘i i ai pe e mafai ona nofo i le pō atoa i lo latou fale. Sa tali mai o ia: ‘O lo‘u tamā o Petueli, ma e maua le avanoa e te nofo ai ma i matou.’ Sa iloa lelei e le auauna a Aperaamo o Petueli o le atalii o le uso o Aperaamo o Nakori. Ona tootuli ai lea o ia i lalo ma faafetai iā Ieova i le ta‘ita‘iina o ia i aiga o Aperaamo.

I le pō lava lenā na ta‘u atu ai e le auauna a Aperaamo iā Petueli ma le tuagane o Repeka o Lapana le māfuaaga sa sau ai o ia. Sa latou malilie uma o le a alu Repeka e faaipoipo ma Isaako. Sa ioe fo‘i i ai Repeka e alu. O le isi loa aso na sosoo ai sa tietie ai loa i la‘ua i kamela ma amata le malaga umi e toe fo‘i i Kanana.

Ina ua la taunuu atu, ua oo i le afiafi. Sa iloa atu e Repeka se tamāloa o savali mai i le fanua. O Isaako. Sa fiafia tele o ia ina ua vaai iā Repeka. O lona tinā o Sara ua oti o ia mo tausaga e tolu, ma o loo ia faanoanoa ai pea. Ae ua alofa tele Isaako iā Repeka, ma ua toe fiafia nei o ia.

Kenese 24:1-67.



Fesili

  • O ai le fafine ma le tamāloa o loo i le ata?
  • O le ā na faia e Aperaamo ina ia maua ai se avā mo lona atalii, ma aiseā?
  • Na faapefea ona taliina le tatalo a le auauna a Aperaamo?
  • O le ā le tali a Repeka ina ua fesili atu i ai pe e fia faaipoipo iā Isaako?
  • O le ā le māfuaaga na toe fiafia ai Isaako?

Fesili faaopoopo

  • Faitau le Kenese 24:1-67.

    O ā uiga lelei na faaalia e Repeka ina ua feiloa‘i i le auauna a Aperaamo i le vaieli? (Kene. 24:17-20; Faata. 31:17, 31)

    O le ā se faaa‘oa‘oga lelei mo Kerisiano i aso nei i tapenaga na faia e Aperaamo mo Isaako? (Kene. 24:37, 38; 1 Kori. 7:39; 2 Kori. 6:14)

    Aiseā e ao ai ona sema so tatou taimi e mafaufau loloto ai, e pei ona sa faia e Isaako? (Kene. 24:63; Sala. 77:12; Fili. 4:8)