Ibya bole bolesaarmaladga

Menú dagegga

Menú baid daggega

Indice daggega

Yaba nanaid daggega

Jehovági sunmagmalad

An garda Bibliag sunmagged

15: Lot ome, yargansik atasa

LOT e gwenadgan burakwa Abrahán waliki gudimalana Canaán neggweburgi. Ibagwengi Abrahán Lotga soggali: ‘Anmar ibmar durgan bukidar guchoggua weg napa galakugusa. Anmar nagi bangumalar gebed. Be wesik nadele, andi baichik namogoed.’

Lot napa dakarsunna. Geb dakali napa soggwen nued nai, dii nika geb gagan nued nikbali e ibmar durganga. Jordán Yalana. Degsoggu Lot na bela e gwenadgan sesa geb e ibmar durganmar we yarse. Geb neg sobsamala Sodoma neggweburgi.

Sodoma dulemar dega nue isgus bukmalad. Lot dina dule nuechoggu nued itosuli weyob dulemar damaladba. Bab Dummad amba we ibmar nued daksurmoga. Geb Bab Dummad angermar warbo, Lot sega barmiarsunna, owisogega Sodoma neggwebur obelolesoggarye geb Gomorra neggwebur amba obelolemogoye, ar e dulemar isgana damarye.

Geb angermar Lotga soggarmala: ‘¡Gwaegi! ¡Be ome be sede geb be sisgan warbogwad sedbalo geb be noe!’ Lot e gwenadgan bogwa binna gunanaina, aaga angermar argangi gadebin imasmarsunna geb neggweburgi onosmala. Degiidgi anger wargwen soggali: ‘¡Abarmakmala na bemar san bendakega! Mer yarganba atakmalo. Yarse abarmakmalo, mer bemar burgwega.’

Lot e sisgan bogwa sogedba imasmala geb Sodomagi nosmala. Bipisaar gwisgu gwisgu nachurmala, geb yarganba atachurmarbali. Aukine Lot omedi eg soglesadba imachuli. Sodomag wis bannaba gusgu, gwisgusa geb yarganba atasa. Geb Lot ome, balu gwamakaledga binnichunna. ¿Be daksa bia gwichi?

We ibmar gusadgi ibmar nued soggwen anmar nabir durdake: dulemar Bab Dummad sogedba daele, Bab Dummad nabir bendake, auki dule Bab Dummad sogedba dasulirdi, adi burgoe.

Génesis 13:5-13; 18:20-33; 19:1-29; Lucas 17:28-32; 2 Pedro 2:6-8.

Lot Sodomagi wakinmaid


Egislenaid

  • ¿Ibigala Abrahán, Lotbo nagi bangusmala?
  • ¿Ibigala Lot, Sodomag bur gudigue binsaali?
  • Sodoma ginmalad, ¿dule igi damaladi?
  • Angermar warbo, ¿ibu ibmar guoed Lotga sognonimala?
  • ¿Ibigala Lot ome balu gwamakaledga binnisa?
  • ¿Ibu anmar durdake Lot ome weyob gusadgi?

Bamalad egislenabalid

  • Absoge Génesis 13:5-13.

    Dule bamaladbo wis anmar igar gwatirisad nudakechik, ¿ibu anmar durdake Abrahángi? (Gén. 13:8, 9; Rom. 12:10; Fili. 2:3, 4.)

  • Absoge Génesis 18:20-33.

    Abrahán, Jehová bogwa sunmasadgi, ¿igi anmarse oyolege, Jehová, Jesúsbo dulemarga igar itoalile, innikigwadgi dulemarga igar itogoye? (Gén. 18:25, 26; Mat. 25:31-33.)

  • Absoge Génesis 19:1-29.

    Bibliag anmarse oyolege yobi, ¿Bab Dummad igi dake dule na omegiidga saedi? (Gén. 19:5, 13; Lev. 20:13.)

    ¿Ibu gine akar gue Lot ibmar imasad, Abrahán ibmar imasadbo Bab Dummad wemarga igar ukmai gusgu, geb we ibmargi ibu anmar durdake? (Gén. 19:15, 16, 19, 20; 22:3.)

  • Absoge Lucas 17:28-32.

    Lot ome ¿bule ibmar nikgued bin itoge daklegele, geb wegi neg gusadba, ibu mer anmar imakedi? (Luc. 12:15; 17:31, 32; Mat. 6:19-21, 25.)

  • Absoge 2  Pedro 2:6-8.

    Lot yobi, ¿igi anmar dulemar Bab itosurmalad dakmogadi? (Eze. 9:4; 1 Juan 2:15-17.)